Amazon ని మెప్పించిన ఖమ్మం కుర్రోడు.. 21ఏళ్లకే రూ.64లక్షల జీతంతో కొలువు

భద్రాద్రి జిల్లా టేకులపల్లి మండలానికి చెందిన నిఖిల్ అనే యువకుడు అమెజాన్ సంస్థలో రూ.64లక్షల ప్యాకేజీతో ఉద్యోగం సాధించాడు. నిఖిల్ బాసర ట్రిపుల్ ఐటీలో బీటెక్ నాలుగో ఏడాది చదువుతున్నాడు.

బాసర ట్రిపుల్ ఐటీలో చదువుతున్న ఓ విద్యార్థి ఏడాదికి రూ.64లక్షల వేతనంతో జాబ్ కొట్టి సత్తా చాటాడు. పట్టుదల, ప్రతిభ కలబోసిన ఆ 21ఏళ్ల యువకుడు తల్లిదండ్రుల కోరికను నెరవేర్చడంతో పాటు యువతకు ఆదర్శంగా నిలిచాడు. భద్రాద్రి కొత్తగూడెం జిల్లా టేకులపల్లి మండలం ముత్యాలంపాడు గ్రామానికి చెందిన తంగెళ్లపల్లి ఈశ్వరాచారి, అనితాలక్ష్మి దంపతులకు ఇద్దరు కుమారులున్నారు. పెద్దకొడుకు నిఖిల్ 1 నుంచి ఐదో తరగతి మండల కేంద్రంలోని ఓ ప్రైవేటు పాఠశాలలో, 6 నుంచి పదో తరగతి టేకులపల్లి ప్రభుత్వ ఉన్నత పాఠశాలలో చదివాడు. 2016లో వెలువడిన పదో తరగతిలో 10 జీపీఏ సాధించి సత్తా చాటాడు. 

దీంతో నిఖిల్‌కి బాసర ట్రిపుల్ ఐటీలో సీటు దక్కింది. అక్కడే ఇంటర్‌తో పాటు బీటెక్‌‌(కంప్యూటర్ సైన్స్‌) పూర్తిచేశాడు. చివరి ఏడాది చదువుతుండగానే క్యాంపస్‌ సెలక్షన్‌లో భాగంగా అమెజాన్‌ సంస్థలో జాబ్ సాధించాడు. సాఫ్ట్‌వేర్‌ డెవలప్‌మెంట్‌ ఇంజనీర్‌గా ఏడాదికి రూ.64 లక్షల వేతనంతో కొలువు సాధించడంతో తల్లిదండ్రుల ఆనందానికి అవధుల్లేకుండా పోయింది. నిఖిల్ ప్రతిభను చూసి కుటుంబసభ్యులు, బంధువులతో పాటు అతడి స్నేహితులు గర్వంతో ఉప్పొంగిపోతున్నారు. స్పెయిన్‌ రాజధాని మాడ్రిట్‌లోని అమెజాన్‌ కార్యాలయంలో మరో రెండు నెలల్లో విధుల్లో చేరబోతున్నట్లు నిఖిల్‌ చెబుతున్నాడు.

Nationalist Voice

About Author

error: Content is protected !!