సెక్స్ వర్కర్లకు ఆధార్ కార్డులు: సుప్రీం ఆదేశం

నేషనలిస్ట్ వాయిస్, మే 19. న్యూడిల్లీ :  దేశంలోని సెక్స్ వర్కర్లకు కూడా ఆధార్ కార్డులు జారీ చేయాలని కేంద్రాన్ని సుప్రీంకోర్టు ఆదేశించింది. ప్రతి ఒక్కరికి సమానంగా, గౌరవంగా బతికే హక్కు ఉంటుందని కోర్టు అభిప్రాయపడింది. యునిక్ ఐడెంటిఫికేషన్ అథారిటీ ఆఫ్ ఇండియా (యూఐడీఏఐ) జారీ చేసిన ప్రోఫార్మా ఆధారంగా ఆధార్ కార్డు ఇవ్వాలని సూచించింది. జస్టిస్ ఎల్.నాగేశ్వర రావు, జస్టిస్ బీఆర్ గవై, జస్టిస్ ఏఎస్ బొపన్న ఆధ్వర్యంలోని బెంచ్ గురువారం ఈ తీర్పు ఇచ్చింది. సెక్స్ వర్కర్లకు సంబంధించిన సమాచారం బయటకు వెల్లడించకూడదని ఆదేశించింది. ‘‘నేషనల్ ఎయిడ్స్ కంట్రోల్ ఆర్గనైజేషన్ లేదా ప్రాజెక్ట్ డైరెక్టర్ ఆఫ్ ఎయిడ్స్ కంట్రోల్ సొసైటీకి చెందిన గెజిటెడ్ ఆఫీసర్స్ జారీ చేసే సర్టిఫికెట్ల ఆధారంగా యూఐడీఏఐ సెక్స్ వర్కర్లకు ఆధార్ కార్డులు జారీ చేయాలి. ఆధార్ కార్డులు ఇచ్చేందుకు సెక్స్ వర్కర్లను ఎలాంటి దృవీకరణ పత్రాలు అడగాల్సిన అవసరం లేదు. ఎలాంటి పత్రాలు లేకున్నా రాష్ట్రాలు, కేంద్ర పాలిత ప్రాంతాలు ఆధార్ కార్డులు తప్పనిసరిగా జారీ చేయాలి. వాళ్లకు రేషన్ అందేలా చూడాలి. వోటర్ ఐడీ కార్డులు కూడా అందివ్వాలి’’ అని కోర్టు సూచించింది. కోవిడ్ సందర్భంగా ఎక్కువ సమస్యలు ఎదుర్కొన్న వాళ్లలో సెక్స్ వర్కర్స్ ముందుంటారు. జీవనానికి చాలా ఇబ్బందులు పడ్డరు. దీంతో వీళ్ల సంక్షేమాన్ని దృష్టిలో ఉంచుకుని, కేంద్ర ప్రభుత్వం ఇచ్చే రేషన్ అందించాలని పిటిషన్ దాఖలైంది. ఈ పిల్ విచారణ సందర్భంగా కోర్టు తాజా సూచనలు చేసింది. సెక్స్ వర్కర్లు అందరికీ ఎటువంటి ధృవీకరణ పత్రాలు లేకున్నా రేషన్ అందించాలని సూచించింది. ఈ నిర్ణయం వల్ల దేశవ్యాప్తంగా ఉన్న తొమ్మిది లక్షల మంది మహిళా సెక్స్ వర్కర్లు, ట్రాన్స్‌జెండర్ సెక్స్ వర్కర్లకు మేలు జరగనుంది.

Nationalist Voice

About Author

error: Content is protected !!